播出日期:16/3/2020
唔好以為煲湯要出動到藥材同埋海味係好麻煩喎，今日就教大家一步一步煲呢個 猴頭菇螺片煲豬骨，即刻睇吓材料啊！
猴頭菇 3-4個
螺片 數塊
黃芪 2片
巴戟 適量
杞子 適量
蜜棗 3-4粒
紅蘿蔔 1個
豬湯骨 適量
薑片 數片
材料嘅份量其實都係參考嘅用途，多啲少啲其實問題唔大嘅。猴頭菇係一種高蛋白、低脂肪、含有豐富礦物質同埋維他命嘅菇類食物，有助降低膽固醇，增強免疫力，市面通常買到嘅呢啲類乾猴頭菇，用之前可以用清水浸大約 15 分鐘，跟住揸乾入邊嘅水份先好用喎。
螺片健脾養胃、滋補肝腎、可以增強免疫力，喺用之前，就要用清水浸螺片大約 10 至 15 分鐘，跟住放落去煲就 OK 㗎啦！
材料入邊嘅黃芪促進新陳代謝，巴戟就可以提高免疫力，連埋杞子、蜜棗用清水洗一洗備用。紅蘿蔔就去皮同埋切粒，再用清水洗乾淨。
今日我揀咗用豬湯骨，大約買咗港幣 $50 左右，你亦都可以選擇用雞或者瘦肉取代。不過記得煲之前飛一飛水，如果唔係煲湯就會好油㗎喇！
材料準備好晒就可以放落煲開始煲湯喇！今次我大約用咗 15 碗水，落完材料記得加埋薑片，用大火煲大約 30 分鐘左右轉文火再煲兩至三個鐘，之後加入適量嘅鹽就飲得喇！如果你要返工唔想睇火，可以用少幾碗水，大火煲咗 30 分鐘之後轉落真空煲，放工返嚟拎出嚟加熱同埋加鹽都一樣可以㗎！
猴頭菇有豐富嘅營養價值，除咗飲咗湯水之外，煮咗嘅猴頭菇都可以用食物較剪剪開，再點豉油食，又或者搵蠔油爆一爆，一樣彈牙又好食㗎！
