播出日期:23/3/2020
有啲網友想煲湯，又唔想落咁多藥材，今日就介紹呢款青紅蘿蔔豬骨湯，有潤肺止咳嘅作用，今日就同大家睇吓！
首先睇吓今日嘅材料：
紅蘿蔔 1-2條
青蘿蔔 1-2條
粟米 1-2條
豬骨 500克
南北杏 適量
薑 2-3片
我首先將紅蘿蔔同埋青蘿蔔去皮同埋洗乾淨，之後切粒待用。紅蘿蔔有潤肺同埋保護呼吸道嘅功效，青蘿蔔亦都可以化痰止咳，喺秋冬同埋抗疫期間，都好啱用嚟煲湯嘅。
之後我哋就切走粟米嘅葉，將粟米洗乾淨再切成一嚿嚿。我就鍾意一條粟米分五至六嚿。之後將南北杏搵清水洗一洗。豬骨就要汆水，跟住再沖乾淨。
跟住就可以將所有嘅材料放落煲，加水，用大火以水滾計煲 30 分鐘左右，之後轉中火或者細火煲個半鐘，用粗鹽調味，跟住就飲得㗎喇！
