播出日期:11/7/2018
最新嘅科技資料、潮流玩意，都有《Z世代達人》麥卓華到處搜羅送到你面前！
小米旗下紅米品牌嘅手機出名性價比高，近來佢哋就推出咗紅米6手機，仲要以售價唔駛一千港幣為賣點。
打開手機盒就會見到包埋充電器同充電線，不過就冇咗之前紅米5 隨機附送嘅保護膠套。部機正面用咗全屏幕設計，屏佔比有8成左右，指紋感應器就好似上一代咁喺部機嘅後面。手機後置咗1200萬像素+500萬像素雙鏡頭，而最有驚喜嘅，就係真3卡設計，可以同時放兩張NanoSIM卡同埋一張MicroSD卡，比其他三揀二手機方便。
呢部手機可以支援雙4G接收，只要你喺設定入面嘅雙卡和行動網絡選項內，啟動返開啟雙4G，兩張卡都行緊4G，仲一齊支援VoLTE添。
用YouTube睇高清片，效果唔錯，亦無唔暢順或者等候下載嘅情況。今次打開TVB新聞嘅流動應用程式，主要試吓顯示新聞台直播下面嘅走馬燈暢唔暢順，可能因為走馬燈需要嘅處理器資源比較多，明顯見到影片唔太暢順。不過一部唔使＄1000嘅手機又可以要求幾多呢？
紅米6用上聯發科全新嘅P22晶片，賣點係優化咗電力的管理，而根據聯發科嘅網頁資料，紅米6支援最高Cat4、亦即係每秒150mb嘅下載速度。
我哋試吓用佢內置嘅相機應用程式影返張實物照先！對焦同埋儲存都好快完成，冇一般入門手機延遲嘅情況，加上有唔同模式嘅選擇。自拍方面，仲可以加入智慧美顏模式。
雖然呢部機喺某啲功能上面行得比較吃力，不過以一部咁平嘅入門級手機嚟講，其實我個人已經覺得超值。
《Z世代達人》
主持：麥卓華
