Z世代達人

播出日期:14/9/2018

蘋果於香港時間2018年9月13日零晨,發佈了3款新一代嘅旗艦手機 iPhone Xs、iPhone Xs Max同埋 iPhone Xr。雖然三款新手機在外型上都唔算有太大驚喜,但係其實都有唔少新功能同埋特色嘅。今日就同大家介紹下!
 
iPhone Xs 係17年推出嘅 iPhone X 更新版,大小、外型都幾乎完全一樣,只係重咗大約3克,5.8吋螢幕嘅解象度亦同上一代一樣。規格方面,iPhone Xs 用咗新一代嘅 A12 Bionic 處理器,官方表示比上一代 A11 處理器快15%,亦可以減低40%嘅電池消耗。新機支援新一代嘅FaceID,辨識比上一代快一倍,而機身用料亦都有優化,新機支援 IP68 防水防塵,相比起iPhone X嘅1米,Xs 可以在2米深嘅水入面操作長達30分鐘,照咁講應該成部機跌落泳池都唔駛擔心喇。雖然前、後鏡頭在硬體上無更新,不過在軟體上就加入咗 Smart HDR 技術,官方表示新一代HDR技術可以令相片更自然更靚,真實效果係點? 就要試過先知喇!
 
講到功能上最大嘅突破,可以算係新機終於支援雙卡功能。呢個功能相信唔駛我多介紹,因為雙卡在大部份嘅Android手機上已經係好基本嘅配置,估唔到蘋果在介紹呢個「新」功能時,都可以將佢變成一個全新偉大嘅發明一樣… 相信都只有佢地先有呢個膽色喇。 不過又咁講,今次除咗大陸地區以外,在大部份市場推出嘅都係行一張實體SIM加一張eSIM嘅雙卡版本,相信各大台又要為eSIM嘅 iPhone Xs 系列做準備,而如果部 iPhone出咗問題,你又用緊 eSIM做主SIM,第二時要換卡就可能無咁容易。
 
iPhone Xs在容量上面亦有突破,最大內置512GB嘅容量,相信絕大部份嘅朋友都應該夠用。顏色方面,除左上一代嘅太空灰同銀色之外,亦新加入咗金色做選擇。價錢方面,64GB、256GB同512GB嘅價錢分別係$8599、$9899同埋$11,599。
 
另外,為咗回應市場對大Mon 嘅需求,今次蘋果亦推出咗iPhone Xs Max手機。Xs Max 手機在規格同功能上大致同 Xs 一樣,但螢幕就加大到6.5吋、支援1242 x 2688 解像度。雖然螢幕大咗,但手機整體嘅大細同上一代 iPhone 8 Plus 相若,所以用緊 Plus 系列又覺得 iPhone X 細嘅用家,呢部機就岩晒喇。另外,呢部機亦獨有之前一直只用在 iPAD 上嘅 Split View功能,方便同時使用兩個唔同嘅應用程式,用盡呢個 iPhone 歷史上最大嘅螢幕。最特別嘅係,在中國大陸、香港同澳門地區買到嘅 iPhone Xs Max係支援兩張實體Sim嘅雙卡功能架!價錢方面,64GB、256GB同512GB嘅價錢分別係$9499、$10,799同埋$12,499。
 
最後,蘋果今次亦推出咗價錢上較平嘅 iPhone Xr系列手機。同Xs系列嘅外觀差唔多,保留左「留海」設計,亦同樣用上 Xs 系列嘅 A12 Bionic 處理器,螢幕用左6.1寸嘅 LCD Liquid Retina技術,前鏡頭支援 FaceID解鎖,後置千二萬像素鏡頭。不過,呢部機唔支援蘋果獨家嘅 3D Touch技術,改為使用全新嘅「Haptic Touch」技術,呢個技術其實同長按差唔多,用來在較平嘅機款入面取代 3D Touch 用力按螢幕時所出現嘅選項。講到最特別,就係 iPhone Xr 會有6款色彩繽紛嘅顏色選擇,我個人就鍾意黃色,唔知你嘅選擇又係點呢?價錢方面,64GB、128GB同256GB嘅價錢分別係$6499、$6899同埋$7,799。
 
iPhone Xs 同 Xs Max將會於9月14日接受預訂,並於9月21日正式開賣。而 iPhone Xr 就要等到10月19日先有得預訂,10月26日才正式開售!
  
《Z世代達人》
麥卓華

追蹤我們
公司殊榮
Copyright Claims
Copyright Claims