Z世代達人

播出日期:16/10/2018

Google在2018年10月初,發表了全新嘅 Pixel 3 系列手機。來到第三代嘅「親生仔」,今年呢部年度之作有乜嘢特別?即刻就同大家睇下!
 
Pixel3 系列同其他品牌推出嘅旗艦手機一樣,使用高通 S845 嘅處理器,4GB記憶體,內置64GB或128GB容量。Pixel 3 配備5.5寸螢光幕,Pixel 3 XL嘅螢光幕就係6.3 寸。值得留意嘅係,5.5寸嘅Pixel 3並無完全使用全屏設計、反而大機 Pixel 3 XL 就用左全屏加瀏海嘅外觀,感覺較為討好。顏色方面除咗有黑同白兩色選擇之外,亦有感覺較為年青嘅淺粉紅色,相信推出嘅時候又會成為搶手嘅焦點。
 
同上一代一樣,兩部機支援一張實體NanoSim同一張eSIM,配備一個後置1200萬像素主鏡頭同埋2個各800萬像素嘅廣角同超廣角前置自拍鏡。另外Pixel 3 同 Pixel 3 XL 同樣支援IP68 級數防水防塵。
 
功能方面,呢部機預載咗最新嘅 Android 9.0操作介面,配合大量嘅人工智能技術,提供新一代嘅獨家功能,包括智能揀相功能,確保唔會出現相中人貶眼或者其他唔理想嘅情況。同時,兩個前置鏡頭可以互相協調,收錄到更多人一齊自拍。Super Res Zoom 功能透過人工智能,當你放大相片嘅時候都唔會朦,加埋Playground功能,將得意嘅卡通人物合成在你嘅相片入面,大大提升相機各方面嘅功能同埋趣味性。
 
呢兩部手機亦提供「Screen Call」功能,當你唔方便接聽電話嘅時候,手機嘅Google Assistant 智能代理會幫你接聽,仲會用人工智能記低邊個搵你同埋乜嘢事,再發文字訊息俾你,就算唔方便聽同講,都唔會錯過每一個重要嘅消息啦!
 
另一個較為特別嘅賣點,就係Pixel 3同埋 Pixel 3 XL 都加入咗 Google 自行研發嘅 Titan M 晶片,保障用戶資料嘅安全。雖然Google無交代呢粒晶片嘅運作詳情,不過就在網誌透露Titan M 晶片大大提昇咗鎖屏同埋手機內部資料加密嘅可靠性,相信對於關心用戶私隱嘅朋友來講都算係其中一個吸引之處喇。
 
Pixel 3 同 Pixel 3 XL 暫時唔會在香港有行貨推出,而除咗歐美地區之外,亞洲區就只有日本、新加坡同埋今年新增嘅台灣地區可以買到。唔知又會唔會掀起新一輪嘅手機熱潮呢?睇來就要拭目以待喇。
 
《Z世代達人》
麥卓華

追蹤我們
公司殊榮
Copyright Claims
Copyright Claims