播出日期:1/11/2018
蘋果Apple在香港時間2018年10月30日晚上，發佈咗新一代嘅 iPad Pro。上一次發佈新 iPad Pro已經係2017年6月嘅事。而今次所發表嘅新機，其實同早前嘅網上消息差唔多，在外型同功能方面都帶來咗新鮮感。我哋一齊同大家睇睇！
呢一代嘅 iPad Pro 彩用全新嘅A12X 處理器，配合新加入嘅圖像處理晶片，令 iPad Pro 成為一部全功能嘅平板，應付包括剪片、繪圖、高階遊戲、同埋睇超高清片對硬件嘅要求。
尺寸方面今次嘅 iPad Pro分為全新嘅 11寸同舊有嘅12.9寸兩個版本，邊框比上一代更幼，不過都可以容納到前置嘅鏡頭同埋感應組件，所以唔需要有 iPhone 系列嘅「劉海」，另外亦取消咗「Home」掣，成為真正嘅「全面屏」平板，螢幕採用咗 Liquid Retina技術，解像度分別為11寸嘅 2388 X 1668 同埋 12.9寸嘅 2732 X 2048。
11寸型號對比舊有嘅10.5寸版本，螢幕明顯大咗，但大細以及重量就相約。12.9寸型號對比上一代就有明顯分別，因為邊框幼咗，所以成部機都細咗同薄咗好多。
鏡頭方面，後置一個 1200萬素嘅鏡頭，而前置嘅700萬自拍鏡就支援True Depth技術，順理成章可以以FaceID解鎖，取代之前嘅TouchID指紋解鎖技術，同 iPhone X 系列睇齊。另外，為滿足有容量需求嘅朋友，今次Apple仲推出咗最大嘅 1TB版本！係，你無聽錯，係內置 1TB 嘅儲存空間！
另外最特別嘅亮點，就係新機唔再用 Lightning接頭，而改用咗較為大路嘅 USB-C 充電、配件連接同埋資料傳輸，相信係因為新機對電力嘅需求更高，亦可以講將 iPad Pro嘅級別同都係用Type C頭充電嘅 Macbook 睇齊。不過點都好，呢個轉變對消費者來講，都係一個好消息。但同一時間，新機無咗3.5mm嘅耳機插，對於想一邊充電同用有線耳機嘅朋友想講，會有啲唔方便喇。
今次亦推出咗新一代嘅 Apple Pencil，呢支新嘅 Apple Pencil 外型更似一支鉛筆，可以透過磁力吸在ipad旁，支援無線充電，亦都透過手指在使用時輕點兩下切換模式，相當聰明！
新 iPad Pro 即時已經接受預訂，2018年11月7日公開發售。價錢方面，以最平嘅64GB Wifi版為例，11寸賣 $6399，而12.9寸就賣緊 $7999。新一代嘅 Apple Pencil 就賣 $999。你又會唔會心動呢？
《Z世代達人》
麥卓華
