Z世代達人

播出日期:30/1/2019

過年封利是係中國人嘅傳統,隨著電子錢包嘅出現同普及,過去幾年相信大家都有收過或者派過電子利是。不過可能因為電子利是太過虛擬,由派到收都無嘢過手,所以呢幾年都無大行其道。唔知今日嘅介紹,又會唔會改變傳統嘅派利是習慣呢?
 
講緊嘅就係新加坡星展銀行今年推出嘅QR利是喇。有別於一般嘅電子利是,呢款QR利是外型同一般嘅利是一樣,唔拆出來,都唔會知入面原來係一張同銀紙大細差唔多嘅QRCode賀卡,呢張卡雖然唔可以直接當銀紙洗,但就可以「嘟」落你電子銀包用。點玩法呢?
 
首先講下點派利是先。你可以去星展銀行嘅分行拎呢啲QR利是,當你封利是嘅時候,只要打開新加坡星展銀行嘅PayLah手機錢包應用程式,「嘟」一「嘟」個QRCode,再揀番你想封嘅利是銀碼,之後就會直接在電子錢包扣數,你亦都可以將呢張增咗值嘅QR利是放入利是封入面派喇!
 
收到QR利是就更加簡單,只要你通過PayLah手機應用程式,「嘟」一「嘟」個QRCode,利是嘅金額就會馬上顯示同埋入帳到你嘅電子錢包入面,來到呢個乜都可以電子交易嘅年代,其實仲方便過收銀紙架! 好可惜,呢個服務暫時只在新加坡推出,香港唔知幾時先有得玩呢? 
 
Z世代達人
麥卓華

追蹤我們
公司殊榮
Copyright Claims
Copyright Claims