Z世代達人

播出日期:5/7/2019

用開三星手機嘅朋友,可能會有發現手機入面有個叫做「安全資料夾」嘅功能,不過試吓按入去就有一大堆問題要設定,最後可能用到換機都未用過。咁呢個「安全資料夾」究竟係有啲咩用呢?

「安全資料夾」其實係三星為個人手機設計嘅安全部份,原意係俾用戶可以喺入面開啟手機嘅App做野,唔會被手機其他部份影響到。喺安全資料夾入面,你可以以另一個公司Google Account Login,亦都可以設定有獨立嘅相簿、通訊錄等等… 嚴格嚟講,其實就係一部虛擬嘅內置電話!

同一部實體電話一樣,你可以喺安全資料入面安裝任何Google Play Store 嘅 App,有獨立嘅相簿同埋相機,而且喺安全資料夾入面嘅資料,係唔會同手機原先嘅設定或者同一個應用程式溝亂,
所以對於一公一私手機嘅朋友,用到呢個安全資料夾,就可以免除用兩部手機嘅麻煩喇!

記得之前我哋都教過大家點樣可以喺三星 Android 手機透過 Dual Messenger 嘅功能同時用到兩個 Whatsapp,聰明嘅你到呢刻就應該會知道,如果喺「安全資料夾」入面安裝Whatsapp,加埋之前用Dual Messenger嘅方式,一共就可以同時喺同一部手機入面安裝到3個唔同電話嘅Whatsapp喇!不過一個人又係唔係需要咁多Whatsapp呢? 呢樣就留番俾你決定喇!

《Z世代達人》
麥卓華

追蹤我們
公司殊榮
Copyright Claims
Copyright Claims