Z世代達人

播出日期:16/10/2019

Samsung 一直希望可以為 Galaxy S 同 Galaxy Note 系列嘅用戶增值,兩年前就推出咗 Dex 服務,只要將手機放落指定嘅 Dex 底座,就可以在喺外置屏幕上面有接近桌面電腦嘅體驗。不過要帶埋個底座出 Trip 先用到就好似有啲唔方便,所以近嚟 Samsung 又加推咗呢條 Dex Cable 取代底座。今日就同大家試吓!

呢條 Samsung Dex Cable 一邊係接駁手機嘅 USB-C 頭,另一邊就係用作接駁電視嘅 Full Size HDMI 頭。兩邊都分別插好手機同埋電視之後,電視就會見到手機畫面,而喺手機上面作確認要啟動 Dex 模式之後,電視就會出現一個同 Windows 相似嘅介面,除咗可以配對藍牙滑鼠同埋鍵盤使用之外,你嘅電話本身亦都可以用作 Touchpad 同埋鍵盤輸入用。

等我開個 app 試吓先,如果有關嘅手機應用程式好似 Chrome 咁,已經對 Dex 進行咗優化,你就會見到程式開啟嘅時候會變成正常嘅視窗模式,等我開 Meeee:P More 嘅網頁睇吓,你會見到排列同用桌面電腦冇分別,開個 video 睇吓,仲可以睇到全螢幕嘅模式,如果用一般嘅畫面鏡象線,絕對做唔到呢個效果。

不過唔係每個手機應用程式都有進行 Dex 優化嘅。等我打開無綫新聞應用程式,出嚟嘅效果就變咗同一般用手機畫面睇冇分別,想全螢幕睇新聞呀?暫時喺呢個模式就做唔到喇!

好!等我試吓開埋 Microsoft Word 同埋 Excel 先!手機版做唔到或者顯示唔到嘅效果通過 Dex 桌面,就變咗用電腦一樣,都算方便。好可惜呀,有做優化嘅程式唔係咁多,距離全功能電腦嘅體驗,相信仲有一段漫長嘅道路。

《Z世代達人》
麥卓華

追蹤我們
公司殊榮
Copyright Claims
Copyright Claims