Z世代達人

播出日期:15/11/2019

相信唔少 iPhone 嘅用家喺推出咗 iOS 13 之後,都第一時間將自己嘅手機升級到最新嘅操作系統。不過你又知唔知,原來 iOS 13 入面都有啲隱藏功能,今日就同大家睇吓!

之前都有講過,當 iPhone 連接 Wi-Fi 之後,好多時都會喺背景執行更新、上載等等嘅操作,當遇到連接嘅 Wi-Fi 都要按量收費嘅時候,呢類背景操作就好容易用巳哂啲流量。為咗解決呢個問題,Apple 引入咗 Wi-Fi 低數據模式,你可以去連接咗嘅 Wi-Fi 入面開啟「低數據模式」,咁就可以停止冇即時需要嘅背景數據操作。

有時一個地方同時有幾個 Wi-Fi,以前要入設定入邊嘅 Wi-Fi 選項先至可以揀到用邊個 Wi-Fi,而家就多一個選擇喇!你可以拉控制中心落嚟,長撳 Wi-Fi,之後再長撳多次Wi-Fi 嘅圖示,有關嘅 Wi-Fi 就會列晒出嚟。揀藍芽配對亦都可以用呢個方法做㗎!

最後同大家介紹多個關於電池嘅隱藏功能。你有無試過升級咗 iOS 13 之後,瞓醒都係充電充到 80% ,充唔滿?放心,原來 iOS 13 為咗確保電池嘅健康,用人工智能估算你平時起身嘅時間,喺你臨起身時候,先至幫你充滿部手機。但對於起身唔定時嘅朋友嚟講,呢個功能反而會帶嚟不便。其實你只需要去「設定」、「電池」、「電池健康度」、熄翻「最佳化電池充電」就可以停咗呢個功能!

《Z世代達人》
麥卓華

追蹤我們
公司殊榮
Copyright Claims
Copyright Claims