生活部落格

播出日期:30/3/2020

生活忙碌嘅朋友,放工返屋企都想快快脆脆滾啖湯飲吓嘅。今日就介紹呢個冬瓜粒湯,只需要 15 到 20 分鐘就有得飲,一齊睇吓!

首先睇吓今日嘅材料:
冬瓜 1 片大約 1/3 斤
冬菇 7-8 粒
瑤柱 適量
瘦肉 1/4 斤
薑 2-3 片

首先大家要記得喺煲之前浸冬菇,將冬菇洗一洗之後就用室溫水浸,我就建議浸過夜,或者返工之前浸,放工返嚟就用得喇。浸好嘅冬菇切走冬菇「定」之後切粒,冬菇水唔好倒,陣間有用㗎。
冬瓜要去皮去囊,之後亦都係切粒。瘦肉切片,之後加入少少鹽、糖、胡椒粉調味。開始滾湯之前先好浸瑤柱,如果唔係浸得太耐,啲瑤柱就會冇味。
跟住煲熱適量嘅水,水滾之後將所有嘅材料放入煲入面,浸冬菇水亦都可以倒埋入去,不過留意底部可能有少少雜碎,所以倒咗大半碗就好收手喇。有啲朋友最後先至落冬瓜,不過我就鍾意一次過落晒,一嚟懶,二嚟冬瓜索晒湯嘅味道,入口就更加好食。
湯喺滾起咗之後煲大約 10 至 15 分鐘,基本上就可以飲㗎喇。想煲湯濃啲,你亦都可以煲多 15 - 20 分鐘,不過因住煲乾水喎!呢個湯唔只可以就咁飲,喺悶熱嘅日子,連飯當湯飯食都唔錯㗎!

追蹤我們
公司殊榮
Copyright Claims
Copyright Claims