播出日期:1/6/2020
夏天又濕又熱，成日飲凍嘢，身體嘅濕氣就更加重，今日就同大家介紹呢款 老黃瓜赤小豆豬骨湯，有健脾袪濕嘅功效，對煩躁失眠亦都有幫助。一齊睇吓材料
老黃瓜 1 個
泥紅蘿蔔 1 個
赤小豆 適量
扁豆 適量
豬骨 300 - 500 克
蜜棗 4 粒
陳皮 2 - 3 片
薑片 3 - 4 片
老黃瓜利尿，降火袪濕，表面越多裂紋就越好，老黃瓜嘅皮都有清熱嘅功效，所以唔使去皮，但係就要搵刷用清水洗乾淨。之後切開老黃瓜，除去入邊嘅果籽同埋果瓤，之後再切細件。
紅蘿蔔洗乾淨之後，去皮同埋切頭切尾，之後亦都係切細件。赤小豆同埋扁豆都係健脾去濕解毒嘅豆類，用清水浸一浸待用。陳皮洗乾淨之後搵水浸一陣，而蜜棗就搵水沖一沖。
豬骨有豐富嘅鐵質同埋蛋白質，經常飲豬骨湯可以增強免疫力同埋紓解疲倦。不過豬骨就一定要先汆水，記得凍水落豬骨，之後滾水計，大約 3 至 5 分鐘再錨起備用。
材料準備好晒之後就可以放落煲入邊，記得落埋幾片薑，之後加適量嘅水，用大火煲滾。水滾之後計 30 分鐘轉細火，再用慢火煲個半到兩個鐘頭，之後加入適量嘅鹽調味，跟住就飲得㗎喇！
