播出日期:3/7/2020
WhatsApp於2018年底推出 WhatsApp Stickers 貼圖功能，改變了大家的溝通模式。WhatsApp 即將會推出 Animated Stickers 動態貼紙 / 動態貼圖功能，配合全新 QRCode 一掃即Chat！測試版本已到手，今日就同大家試下！
香港同星馬嘅朋友，大部份都習慣咗用Whatsapp，不過睇到用LINE嘅朋友嘅動態貼圖郁下郁下，自己又用唔到，唯有得個睇字！不過WhatsApp嘅動態貼圖 Animated Stickers 功能已經準備就緒，我哋仲收到第一手測試版本，今日就即刻同大家介紹下！
首先睇下貼圖！雖然動態貼圖區都係放喺一般嘅貼圖位置，不過旁邊就會多咗個播放嘅Icon，等我Download落嚟試下先！OK喇！ 去番貼圖區，搵番呢Set貼圖出來試下Send先！Send去唔係測試版，現時最新可下載嘅WhatsApp，動態貼圖會變咗靜態。不過如果收件一方都係用緊 WhatsApp呢個測試版本呢，就可以正常顯示呢D動態貼圖喇！
除咗動態貼圖之外，WhatsApp亦都加入咗個人QRCode嘅功能。之前通常都要透過手機嘅電話簿或者WhatsApp連結先可以同新朋友仔傾計，宜家就可以好似其他通訊軟件咁，Scan個QRCode就加到！ 而且仲可以Export個WhatsApp QRCode出來放落卡片或者傳單上面，雖然遲咗啲，不過都好過無啦！
要用到呢兩個功能，Android 嘅手機用戶可以加入 WhatsApp嘅Beta 測試計劃，不過呢排暫時就滿咗額。iPhone用家同埋其他Android用戶，就要等多陣喇！
