播出日期:10/5/2021

好多朋友都問我，如果想緊湊啲玩新加坡嘅景點，有無乜野好介紹？ 今日就同大家推介呢個三小時用腳行盡新加坡嘅路線啦！

今日就會同大家喺三個鐘入面，行晒魚尾獅、Fullerton Hotel、Marina Bay Sands同埋Gardens by the Bay幾個景點，而且仲會同唔同嘅角度睇到新加坡濱海一帶嘅優美景色。首先我哋要搭地鐵紅線或者綠線，去到Raffles Place站，搵H出口 / Merlion Park，上到地面之後，轉右，去到海邊再轉右，見到前面嘅古老建築物就啱喇！呢度就係 The Fullerton Hotel喇！噫！停一停先！千祈唔好錯過呢個檔口，佢係新加坡其中一款地道甜品 - 雪糕三文治！ 一睇咁多人排隊就知要試啦！ 用麵包夾住又厚又硬嘅冰凍雪糕，唔知你又試過未呢？

食完甜品，未去到魚尾獅之前，就不如入一入呢間超五星酒店 The Fullerton Hotel過一過冷河先喇！原來呢度係新加坡以前嘅郵政總局。嚟到就梗係要睇睇呢度嘅歷史啦！原來喺大堂落一層，就搵到呢個介紹前呢度歷史嘅展廳，睇下！同香港回歸前嘅郵筒一樣樣架！仲可以寫封信寄番俾自己… 不過記住… 要貼郵票俾錢架！

過完冷河，之後出嚟就要過橋喇！過到一半，點解見到咁多人影相嘅？ 嘩！有人跳海呀！

其實要影到我後面呢個跳海公仔靚嘅話，當然就要搵多個朋友喺對面岸影啦，不過如果你無嘅話，拎支自拍棍好似我宜家咁呢，都算係一個唔係好差嘅選擇嚟嘅，三、二、一、笑！

影完相就要行快兩步過橋喇，如果唔係太陽都就快落山喇！過到橋，就會見到呢個文化味好重嘅地方！呢度就係Victoria Theatre & Concert Hall！停步影幾張相，感受一下文化氣息之後，跟住搵呢條隧道，之後過橋，再向前行，大約三至五分鐘，就嚟到呢個世界聞名嘅景點 - 魚尾獅喇！呢度除咗可以睇到背後繁華嘅商業區之外，另一邊又可以見到Marina Bay Sands嘅宏偉建築，絕對係一個值得留影嘅地方！

原來我身後面呢座魚尾獅1972年已經係新加坡嘅旅遊標誌嚟，不過呢個位置就係2002年配合旅遊區發展先至搬嚟。

望去另一邊 - 噫，點解有個榴槤咁樣嘅建築？ 原來呢度就係新加坡嘅濱海藝術中心！影張相，之後就向呢個榴槤進發喇！呢條Jubilee Bridge為行人接通咗魚尾獅同埋濱海藝術中心，亦都可以見到新加坡政府為發展旅遊業所花嘅心思。5分鐘左右就嚟到呢邊喇，遠望番頭先身處嘅魚尾獅同埋商業區，又係另一個唔可以唔影嘅靚景！

好多朋友都問我點樣可以用最靚嘅方法影到金沙酒店嘅全景，咁梗係唔係去到金沙酒店旁邊啦，喺呢個歌劇院對出嘅海濱長廊，就係一個又少人，又易影嘅地方喇！好似我宜家後面咁，你話幾靚！

好啦，唔好掛住影相喇！小休一陣之後，就繼續向前進發！行完呢條海濱長廊之後，就會嚟到呢個好似看台咁嘅地方！究竟呢度係乜嚟？原來每年9月，呢度會係一年一度嘅賽車大賽看台，而平日亦會用嚟做軍隊畢業典禮嘅看台架！

大約10分鐘左右，我哋就開始上橋，準備去 Marina Bay Sands嘅方向喇！Marina Bay Sands集酒店、商場、展覽中心同埋賭場於一身，亦係新加坡嘅地標之一，唔只外形靚，頂樓仲係一個無邊際泳池！橋嘅另一邊就係Marina Bay Sands嘅商場入口，等我哋參觀一下呢個商場先啦！

快行完商場，我哋就跟住 Gardens By the Bay牌，向呢個景點進發。一路沿路行，再穿過 Marina Bay Sands酒店，再推門，就嚟到Gardens by the Bay! 等我哋一齊睇下呢度嘅靚景啦！

其他集數

開箱！日本伊豆全新巴士主題旅館BUSTAY │ 飯店開箱 主題住宿 巴士旅館

播放中

[新加坡旅遊氣泡2021] 3小時步遊濱海著名景點！魚尾獅、濱海藝術中心、金沙酒店、濱海灣公園一次玩晒

澳洲自駕遊2020 澳洲墨爾本近距離睇樹熊！生態旅遊第一步！- 食玩飛常遊

食玩飛常遊 - 【新加坡美食2020】- 介央多可以有幾多種食法？帶你去食盡新加坡地道多士！ - 新加坡 自由行 景點 東亞餐室

塔斯曼尼亞景點 2020 蘋果酒係點生產？帶你飲地道 Apple Cidar ! - 澳洲自由行 Huon Cidar

【吉隆坡美食2020】 呢間瓦煲雞飯大不同！慢火煮入味又好食！168餐室 168瓦煲雞飯 Pudu

2020 台北捷運環狀線開通！ 轉乘要注意呢件事......

吉隆坡國際機場KLIA 馬航頭等貴賓室實測！ MH First Class Lounge