Z世代達人

播出日期:19/7/2022

小米旗下嘅POCO一向都有推出電競手機,啱啱就推出咗呢部 POCO F4 GT,唔知啱唔啱你心水呢? 今日同十大家做個開箱!

打開產品嘅盒就可以見到一個原廠嘅透明膠殼,另外有一條 Type-C 轉 3.5mm 耳機插口,機殼嘅下方就係 POCO F4 GT 手機真身、另外仲有一條 Type-C 充電線同埋對應嘅快充插頭。今次手機嘅外型相當有時代感,揸上手嘅質感都好唔錯,而且佢支援5G雙卡雙待,真係出街打機都唔怕有Delay!

POCO F4 GT 作為一部電競型手機,配置一定要高,先可以滿足到一班用家,所以今次屏幕就用上DisplayMate 達到A+嘅6.67吋AMOLED 螢幕,最高支援120Hz屏幕更新率,加上支援杜比全景聲,同埋對稱立體聲四喇叭設計,令你喺打機嘅時候有住彷如置身現場一樣,大大提升打機時嘅代入感。
處理器方面,POCO F4 GT 就用咗 Qualcomm 最新嘅 Snapdragon 8 Gen 1處理器,配合埋 Adreno 730 圖像處理晶片,令到手機可以應付高畫質同高FPS嘅處理,即使打機開到最高畫質,都唔見有LAG機嘅情況出現。

而正正因為針對住打機, POCO F4 GT 喺設計上都有住唔少特別嘅地方,就好似方便同隊友打機時,溝通嘅三組收音咪設計,同埋可以喺打機時自訂嘅 彈出式遊戲鍵,大大減少咗用手機打機嘅不便,而且彈出式遊戲鍵喺唔用嘅時候仲可以收埋,咁就唔怕會影響平時使用啦!

打機另一樣好重要嘅嘢就係電量問題,POCO F4 GT 4,700mAh 嘅大電池,加上120W HyperCharge 智能快充,只需要17分鐘就可以充到100%,就算打到無電,都只需要十幾分鐘,就可以重翻戰場,再同你嘅夥伴們血戰沙場啦!另外今次嘅充電線都有特別設計,等你可以喺充緊電嘅時候,都可以一樣橫置緊握,唔會有條線kick住kick住嘅情況出現。

雖然POCO F4 GT 主要賣點係打機,不過佢嘅拍攝功能都唔馬虎㗎,採用咗三鏡頭設計,分別係 6,400萬像素嘅主鏡頭、800萬像素嘅超廣角鏡,同 200萬像素嘅微距鏡頭,相片嘅質素OK啦! 

今次 POCO F4 GT 12 GB RAM+ 256GB ROM版本,官方售價就賣緊港幣$4999。

如果你係打機嘅愛好者,依部唔知你會唔會考慮呢?

追蹤我們
公司殊榮
Copyright Claims
Copyright Claims