Z世代達人

播出日期:9/5/2018

最新嘅科技資料、潮流玩意,都有《Z世代達人》麥卓華到處搜羅送到你面前!
 
如果你用緊嘅係Android手機,唔知有無發現,部機久不久連接左Wifi之後,就會疾下疾下唔多順,再睇真D原來係下載緊D應用程式更新。如果你部機夠快,Wifi又係完全無限量嘅時候就當然無問題啦!但係,當你出咗Trip又用緊有限嘅Pocket Wifi 或者好慢嘅免費Wifi時,呢個功能就可能會用晒你D數據,又或者拖慢正常上網喇!
 
Android手機入面嘅Play Store通常都會預設左,在Wifi連線嘅情況下,就會自動下載更新,而唔會事先通知你。如果你想熄左呢個功能,可以打開你嘅Play Store,按左上角既三條橫線Menu掣,再按下面嘅「設定」、在「一般」嘅類別入面按「自動更新應用程式」嘅選項,之後,你可以揀「不要自動更新應用程式」就可以喇。
 
但係停左自動更新,記得留意番上面「通知」嘅選項,要剔番「更新通知」,咁有應用程式可以更新時,你都會收到系統嘅通知,到你有Wifi又方便下載嘅時候,你就可以去番Play Store,按入去「我的應用程式和遊戲」、之後在「更新」欄就會見到要更新嘅應用程式,再按「全部更新」就ok喇!
 
另外一個位可以留意嘅,就係主系統嘅更新。你可以在設定嘅軟件更新一欄,熄左「自動下載更新」,當有更新時,你就只會收到更新通知,而唔會在唔過適當既時候自動下載喇。
 
提提你喇,在大部份較為新版嘅Android手機,在「設定」、「連線」、「數據使用量」、拉到最後會搵到一個叫「限制網路」,按入去之後你可以揀番邊D網路係慢或者逐MB計,你只要在呢到揀左,大部份App就唔會再有背景流量出現。不過,我都建議大家做左先前教大家嘅設定先,因為通常到你記得在呢到設定嘅時候,你嘅下載可能已經用左你好多流量了!
 
《Z世代達人》
主持:麥卓華

追蹤我們
公司殊榮
Copyright Claims
Copyright Claims