食玩飛常遊

播出日期:22/10/2018

來到新加坡,仲搵海南雞飯、 咖哩蟹或者炒蘿蔔糕食?你Out喇!今日同你嚟到呢個屋邨嘅大排檔搵間「米之蓮」食吓!你無聽錯,呢到係屋邨嘅大排檔!
 
今日帶大家嚟食嘅就係呢間亞王咖喱雞米粉麵喇。佢地起2016年榮獲米之蓮推介,而排隊嘅大部份都係本地人。成間鋪頭都淨係賣咖喱雞麵同埋米粉。你可以揀粗米粉、幼米粉或者熟麵,師傅跟住就會加入雞肉同埋魚片,再加入埋呢煲有豆腐卜同薯仔嘅咖喱湯底落個碗度,聞到都想流口水喇!
 
咦?點解師傅要將啲湯底倒來倒去呢?我哋問過師傅,佢話如果啲雞放返落啲湯度煮,雞肉就會冇咁好食,用滾起左嘅湯底諗返落熟咗嘅雞同埋魚片上面,口感同溫度先會啱啱好㗎 !如果你可以食得辣,不妨可以加埋旁邊嘅辣油!但係提提你其實原裝呢碗已經夠晒辣㗎喇!
 
嘩!終於都有得食喇!排隊排咗20分鐘都係等呢個米之蓮嘅咖喱雞米線,咖喱雞、豆腐卜、薯仔乜都齊,正到暈呀!我就食先喇,等你哋嚟啦!
 
要來呢到好簡單,最近嘅捷運站係綠色同籃色線嘅Bugis武吉士站,在Bugis Junction 商場出口出,過天橋去對面嘅Bugis Plus商場,再過馬路就見到喇!
 

追蹤我們
公司殊榮
Copyright Claims
Copyright Claims