Z世代達人

播出日期:2/11/2018

新加坡係其中一個港人旅遊熱點之一。身邊好多朋友都會問,如果去新加坡,想買當地嘅預付SIM卡,有乜嘢選擇同埋要留意嘅地方? 今日就同大家講下!
 
新加坡有三間電訊供應商 Singtel、M1同埋Starhub,都有提供4G LTE嘅預付Sim卡。如果你關心網絡質素,咁我哋不如先做個Speedtest先!新加坡其實同香港都係一個密集嘅城市,大部份地區嘅網絡覆蓋都非常完善,呢個測速亦睇到,下載同上載嘅速度都非常理想,所以網絡質素反而唔係點揀卡嘅重點。
 
先睇下呢幾間公司提供嘅預付計劃先。原來3間公司都有提供針對遊客用嘅指定日數預付卡,可能因為競爭激烈,呢類遊客卡開卡後都會有100GB嘅4G數據用量,可以話同無限無乜大分別,再加埋免費通話時間同埋長途電話分鐘,絕對非常抵用。以價錢計,如果你去新加坡唔超過7日,Starhub呢張$12坡紙,即大約$70港幣嘅卡就最岩你、因為除咗呢7日有100GB嘅新加坡本地數據之外,仲送埋1GB數據俾你去馬來西亞、泰國同印尼等共15個地區使用!去埋馬來西亞好似Legoland咁,又或者其他鄰近地區都無問題,方便你唔駛去到唔同嘅地方又要再買過預付卡,費時失事!
 
要買當地呢電訊商呢類遊客預付卡,可以在新加坡機場嘅櫃位,又或者在熱門遊客區嘅電訊商專門店買到。提提你喇,新加坡申請預付卡係要實名登記,每人同時最多只可以申請3張預付卡。
 
如果你想Keep住張預付卡之後用,我就會建議你買當地一般嘅預付卡喇。呢類卡在各大電訊商嘅專門店有售,價錢亦唔貴,最特別嘅係M1同埋Starhub嘅數據,可以同時在好多唔同嘅地方使用,舉個例咁講,M1預付卡可以用S$10買到2GB或者S$5買到1GB用量在包括嘅地方好似馬來西亞、台灣、印尼、澳門用,而Starhub嘅一般儲值卡亦可以$5即係大約HK$29買到1GB在亞太區大部份地區使用、一卡在手,其實去所包括嘅地區都唔駛再買預付卡,只要記住每半年在手機App或者網上幫張卡增值就搞掂!
 
《Z世代達人》
麥卓華

追蹤我們
公司殊榮
Copyright Claims
Copyright Claims