播出日期:3/5/2019
每年大大小小嘅科技展，都會見到智能雪櫃嘅蹤影，不過一直都停留喺「展出」嘅階段，功能相對科幻。近來韓國品牌三星就喺部分地區推出咗首款智能雪櫃，而且功能仲相當貼地添！
一直覺得呢類家庭電器智能化只係「為做而做」，不過因為呢次嘅試玩，令我完全改觀。呢部智能雪櫃採用左右門設計，右邊門設有一個大屏幕，好似部放大咗嘅電話咁，介面就當然係大家熟悉嘅Android系統啦。
成部雪櫃都可以透過呢個Fridge Manager嘅應用程式去控制，好似唔同儲存格嘅溫度，由傳統雪櫃嘅鈕掣，改為可以揀選合適嘅溫度恆溫，唔同格數仲可以有唔同嘅選擇，介面清晰易明。
另一個 View Inside 嘅 App ，顧名思義就係可以睇到雪櫃入面放咗乜野。呢部智能雪櫃內部裝咗廣角鏡頭，可以睇到雪櫃入面嘅情況，你當然可以話打開個雪櫃門都得啦，但如果你喺街，用你部智能電話亦可以遙距睇到，咁就唔駛成日買完又買同一樣嘢啦。呢個App仲可以睇番之前雪櫃內部嘅留影紀錄，想知有無人偷食，或者小朋友幾時食咗乜嘢，就唔再係難事！另外，你亦都可以喺放嘢入去嘅時候，同時輸入相關食物嘅資料同到期日，咁喺食物就快到期嘅時候，就會有「到期提示」！
相信喺雪櫃門貼Memo紙都係唔少朋友嘅習慣，智能雪櫃又點少得呢個功能呢？你可以利用內置嘅App將畫面作為白板、Memo、或者「待做事項」嘅提示，其他流動裝置亦可以睇到及同步，相當方便！另外「食譜」呢個流動應用程式亦都收錄咗好多唔同菜式嘅煮法，搵啱食譜就可以照住來煮，當中唔少食譜仲有影片睇！
呢部智能雪櫃亦都可以當一般平板咁上網、聽歌同睇片，配合屋企入面其他嘅三星裝置，仲可以將客廳嘅電視投射到雪櫃門嘅屏幕同步播放，一邊煮飯都可以同屋企人煲劇講劇情啦！
呢部智能雪櫃嘅功能就相當貼地，不過價錢方面就有D離地，要成$7,499坡紙，即係大約$45,000港幣，大家又會唔會買呢？
《Z世代達人》
麥卓華
![小米 Airdots 青春版 藍牙耳機 [2019] - 香港開箱！](https://i1.ytimg.com/vi/zcx64SFBwGg/mqdefault.jpg)