Z世代達人

播出日期:20/9/2019

華為喺 2019 年嘅 9 月 19 號發佈咗全新嘅 Mate30 系列手機,雖然受中美貿易戰嘅影響,手機並無 Google 嘅加持,不過一樣成為焦點… 宜家就同大家睇吓!

今次 Mate30 系列運行建基於開源版 Android 10 嘅 EMUI 10 介面,操作同介面嘅外觀同上一代嘅手機都無好大嘅分別。外型方面最大嘅賣點就係 Mate30 同埋 Mate30 Pro 機背都用上咗圓形鏡頭位,而屏幕上方就用咗瀏海嘅設計。

Mate30 嘅 FHD+ 屏幕有 6.62 寸,不過就無用流行嘅曲面設計。而擁有 6.53 寸曲面屏幕嘅 Mate30 Pro,彎曲度就高達88度,比 iPhone 11 Pro Max 甚至 Galaxy Note10+ 都仲要大,令外觀更加接近全屏幕嘅佈局。以 Mate30 Pro 嘅重量同埋厚度同 iPhone 11 Pro Max 相比,就更加見得 Mate30 Pro 輕同埋薄,造功相當唔錯啊!

硬件方面,兩部機都配備咗 Kirin 990 處理器,內置 8GB 嘅記憶體,而 Mate30 同埋 Mate30 Pro 分別有 128GB同埋 256GB 嘅內存空間。Mate30 Pro 更會推出 5G 版本,同Samsung Galaxy Note10+ 嘅 5G 本相比,網速明顯快超過 50%,亦都支援雙卡 5G 盲插功能。

操作方面除咗屏下指紋辨識之外,今次 Mate30 Pro 亦都加入咗屏幕發聲功能,為咗善用 88 度嘅彎曲屏幕,Mate30 Pro 仲設有虛擬音量鍵,只要輕輕咁向上或者向下掃,就可以調較大細聲,用法相當人性化。快充方面,Mate30 系列都支援 40W 有線同埋 27W 無線嘅快充技術,就算唔記得充電,部機放低一陣又可以繼續帶出街上網喇。

大家最關心嘅相機同埋鏡頭模組方面,Mate30 有 3 個分別係 4000 萬像素嘅廣角、1600 萬像素嘅超廣角同埋 800 萬像素嘅望遠鏡頭,而 Mate30 Pro 就有 4 個鏡頭,分別係 4000 萬像素嘅角同埋超廣角、800 萬像素嘅望遠鏡同埋一個 ToF 景深鏡。而 Mate30 同埋 Mate30 Pro 嘅前置鏡頭分別係 2400 萬同埋 3200 萬像素,兩部機都支援 3 倍光學變焦同埋最大 45 倍嘅變焦距離。

一向以影相影得靚見稱嘅華為,又點會只得硬件嘅提升呢!配合自家嘅技術,發佈會展示咗超低光模式之之下影相出嚟嘅效果,無論用主鏡頭定係超廣角鏡,喺接近冇光嘅情況之下,畫面質素比 Galaxy Note 10+ 明顯靚好多,另外華為亦都推出咗 CameraKit,方便手機配件生產商簡易配對華為手機,就好似最近推出嘅 Osmo Mobile 3 雲台,
就可以自動配對同埋完美操作華為內置嘅相機程式。

而大家最關心嘅就係 Mate30 系列究竟有冇內置 Google 嘅應用程式。同先前嘅預測一樣,Mate30 系列手機並無預裝 Google Mobile Service GMS,不過華為就同時推出咗 Huawei Mobile Services 同埋加強自家嘅 App Gallery,亦都積極鼓勵手機軟件開發商使用同埋上架,效果係點,就真係要用過先知喇。不過隨着自家嘅 HMS 開發,向手機運行自家嘅操作平台 Harmony 又邁進咗一大步喇!

Mate30 系列都會推出銀、綠、紫、黑同埋皮系列嘅橙色同埋藍綠色,歐洲地區嘅售價分別係 Mate30 嘅 799 歐羅、Mate30 Pro 嘅 1099 歐羅以及 Mate 30 Pro 5G 嘅 1199 歐羅。
今次亦都推出咗 Mate 30 RS Porsche Design 特別版本、12GB 記憶體配合 512GB 內存嘅售價就係 2095 歐羅。

《Z世代達人》
麥卓華

追蹤我們
公司殊榮
Copyright Claims
Copyright Claims