播出日期:8/3/2019
之前《Z世代達人》都有提過，宜家我出Trip，都會用GlocalMe嘅Global Phone 當Wi-Fi蛋用，貪佢大部份嘅地區都用得，月費又唔算貴，而且電量用到一日。不過有時都會大頭蝦，返咗酒店放低咗部機之後再落街，又或者行開行埋，我部雙卡機入面如果有張世界卡就好喇。
雖然我成日都出Trip，但始終呢張卡都係必要時嘅後備，雖然中國移動香港嘅全球數據計劃都算吸引，但因為要6GB一個月起跳，始終唔太啱用。早排我發現，原來之前介紹過新加坡Starhub嘅儲值咭，反而啱我用喎，點解呢？
新加坡電信市場競爭激烈， Starhub呢款儲值咭，所購買嘅當地數據依家可以原價用在全球多個地區，包括香港同埋港人嘅熱門旅遊點好似內地、台灣、日本、韓國、泰國、馬來西亞、澳洲、英國同埋美國等等，基本上我成日要去做嘢嘅地區都包左。佢嘅數據計劃可以逐個月買，價錢都係$11坡紙有1GB，只要記得係到期前透過信用卡喺網上增值，用唔晒嘅數據仲可以累積落下個月。即係大約每個月六十元港幣左右，我部機就多咗個後備環球數據計劃，計落絕對超值。
咁究竟數據表現又係點呢？我哋分別起香港、台北、澳洲都試過用呢張咭做測速，好明顯張卡唔俾你行盡全速，不過大部份時間都有8至10 MB 嘅表現，出 Trip用其實夠有餘。另外，呢張卡由於係新加坡出嘅，所以都會用返新加坡IP嘅，不過對於一般上網就絕對冇問題。
要買呢張咭，就一定要去返新加坡嘅機場或者市區嘅Starhub門市，因為新加坡儲值咭實行實名制，香港係買唔到㗎 ！
Z世代達人
麥卓華
