播出日期:21/8/2019
「嘩！我形容唔到咁好食！我宜家即刻繼續食喇…」
本來以為瓦煲雞飯啫，點估到會好食得咁緊要㗎！
吉隆坡除咗食肉骨茶同埋咖喱魚頭之外，瓦煲雞飯都好出名㗎啵。我都大大話話食咗唔少，不過今次呢間禤記瓦煲雞飯就真係唔講得笑喇！
睇吓個排場先，一煲煲嘅瓦煲雞飯即叫即煮，我哋近距離睇下，原來除咗爐底係用碳燒之外，為咗確保煲仔飯嘅熱力均勻，呢個特別設計嘅蓋將碳嘅熱力由煲蓋帶返落個煲度，一嚟快啲熟，二嚟熱力均勻就可以令到啖啖飯同雞都咁好食，真係咁都俾佢諗到喎。
嘩！終於有得食喇！我今次就揀咗鹹魚臘腸瓦煲雞飯，淨係睇個賣相都一流啦！咦，冇豉油嘅？原來煲入邊嘅飯已經預先撈咗豉油，唔怪得咁香啦！等我撈勻啲飯，潷碟嚟食下先！唔客氣了！
「好好食，同平時油麻地食又唔同，因為呢度啲雞係用豉油腌先整，所以啲豉油係有雞味，淋埋落啲飯呢⋯⋯ 嘩！我形容唔到咁好食，宜家即刻繼續食喇！」
食完一碟，我又搵緊啲嘢呢？
「嘩！ 有飯焦呀！」
食瓦煲飯有飯焦有乜奇呀，不過好食在因為啲飯焦撈咗腌雞嘅豉油，呢種燶燶地又有味嘅飯焦又真係幾好食嘅！
睇下個餐牌先，一煲一人份量嘅瓦煲雞飯都係 $13 馬幣，而我呢個大細，都係 $24 馬幣，抵到爛啦！嫌就咁食煲仔飯寡，可以好似我咁叫個老火湯加油菜，再加杯下火嘅涼水，咁就係完美嘅一餐啦！
要嚟呢度一啲都唔難，可以隨時上佢哋 Facebook 或者 IG 睇吓㗎！
59, Jalan Yew, Pudu, 55100 Kuala Lumpur, Wilayah Persekutuan Kuala Lumpur, 馬來西亞
4PM8+4G 吉隆坡 馬來西亞吉隆坡
+603-9200 1603
