播出日期:22/7/2019
牛肉麵、牛肉麵、都係牛肉麵！台北究竟邊度有咁多款牛肉麵食呢？
台灣出名牛肉麵就係人都知，今日要同你介紹嘅就係呢間連CNN都頒獎俾佢嘅「晶華冠軍牛肉麵」喇。呢間餐廳位於信義區，入面唔算多位，不過就坐得幾舒服。餐牌主要都係以牛肉麵為主，不過如果你唔食牛，都有獅子頭拌麵或者滷肉飯等等食嘅。
好多人都話牛肉麵最緊要就係湯底，呢度嘅紅燒湯底就出名野味同埋香口，先嚟一個招牌嘅精華紅燒牛肉麵，厚切嘅牛肉配合濃味嘅湯底，再加上油炸鬼同埋半生熟嘅流心蛋，睇到好食，聞到就直情口水都流埋出嚟啦。加多$40台幣就可以有多三隻酥炸嘅抄手，呢個雙拼嘅配搭唔知又係唔係你嘅心水呢？
想食清啲，亦都可以試吓呢個「冠軍清燉牛肉麵」，用料一樣咁靚，不過就換咗清湯湯底，但係唔好以為清湯就冇味喎，飲落一樣有好香嘅牛骨味，唔信你都嚟試吓！
唔食牛嘅朋友同朋友嚟一樣唔會冇嘢食個喎，試吓我叫呢碗揚州獅子頭拌麵，唔講你唔知呀，肉丸係放入上湯入面同白菜一齊淆一齊煮，所以吸收咗上湯同埋菜嘅香味之餘，
食落口又唔似平時嘅獅子頭咁乾身，感覺好特別㗎！
除咗麵食之外，喺廚房出邊仲有一系列嘅開胃小菜俾你揀個喎。今日就有冰芥蘭、烤夫、青瓜、豬耳、皮蛋、同埋辣豆腐等等。我叫咗邊幾樣？
好啦等我開估啦，我就揀烤夫、豬耳同埋辣豆腐，配埋幾碗麵一齊食，真係好正㗎！
晶華冠軍牛肉麵
110台灣台北市信義區忠孝東路五段68號
2HR8+6Q 台北 台灣
regenttaipei.com
+886 2 8786 8799
