播出日期:4/9/2020
在家打邊爐、在家食火鍋、 火鍋外送！暖之鍋 Warm in the pot hotpot
見到咁靚嘅食材，唔好以為我出街打邊爐喎！原來呢個係我哋馬來西亞團隊嘅同事，試吓當地近來好流行嘅「在家打邊爐」，疫情期間，安座家中烚吓烚吓，既安心又舒服啦！
今日要同大家介紹呢間暖之鍋 Warm in the pot，一入佢哋嘅網頁，就已經見到好多唔同嘅火鍋配套選擇，最特別嘅係，就算你屋企無爐，佢哋都會成個爐送埋俾你㗎！我哋就揀咗呢個2-3位用嘅尊貴【送電鍋】湯之鍋配套，酸甜開胃嘅番茄湯配埋兩款五花肉片，自選肉我就揀咗牛肉片，維番大約都係港幣250蚊左右，真抵食！
食物準時送到，而且賣相仲唔錯添喎！正如落單嘅時候介紹，除咗食物之外，仲有個襯埋顏色嘅迷你小電鍋！等我喺個保溫袋入面拎啲食物出嚟先！
嘩一盒一盒嘅食物真係同網頁見到嘅完全一樣咁靚㗎！除咗兩包湯底之外，我揀嘅上等五花肉片、牛肉片、各式各樣嘅肉丸同餃子、米粉同麵、哇仲有菜同海鮮、最估唔到嘅係連個醬料Bar都搬埋返屋企，真係同出去打邊爐一樣，而且仲唔使同人迫！
唔講咁多，開餐喇！呢個電鍋一啲都唔失禮喎，火力可以揀快同慢㗎，等我倒個湯底入去先...... 話咁快湯底就滾左，等我試吓片肉先.... 又鮮又嫩，肉質當然靚啦，不過我打邊爐都有一手㗎 ！不過喺香港嘅觀眾，暫時暖之鍋就送唔到咁遠，唯有睇住先啦！
