生活部落格

播出日期:15/9/2020

冰皮月餅 Snowy Mooncake 簡易食譜 - 中秋節人月兩團圓,一家人坐埋食飯嘅同時,如果可以品嘗自己親手做嘅月餅,榴槤月餅、綠茶月餅就更有創意,亦可以成為親子廚房活動!今日就教大家整冰皮月餅,冰皮月餅材料唔難搵,唔好以為好難整喎,其實就算新手都一樣OK㗎!

冰皮月餅做法 - 首先睇吓要準備嘅材料!

冰皮:
粘米粉 40克
糯米粉 40克
中筋麵粉 20克
砂糖 40克
牛奶 180克
煉奶 5湯匙
菜油 2-2.5湯匙
50克月餅模 1個

一站式買齊所需材料 - 東源號:http://www.tungyuenho.com.hk/

另備20-30克糯米粉作為糕粉用

餡料方面,我哋今日就介紹大家用現成嘅餡料,對於新手來講唔需要顧咁多嘢,亦都有更多味道嘅選擇喎!睇吓!除咗我今日揀嘅綠茶味之外,連榴槤、豆蓉等等好多味道都有㗎!

好多時要買齊以上嘅材料,都未必可以一次過喺一間超級市場買到。今日我就嚟到呢間專賣食材的東源號,一次過買齊以上嘅材料同埋月餅模,方便慳時間!亦都可以去佢哋嘅網頁訂購,款式一樣咁齊㗎!

首先將粘米粉、糯米粉同麵粉過一過篩,記住一定要做呢個步驟,如果唔係冰皮就會起粒同唔滑。之後可以落埋糖同菜油,攪拌。

將牛奶同煉奶喺另一個碗攪勻,跟住逐少分幾次加入去篩好嘅粉入面,用打蛋器或者攪拌棒攪勻成糊狀,見到有粉粒要壓散。因為今次我整綠茶味嘅冰皮月餅,我就加咗兩茶匙嘅綠茶粉。

準備一個糕盆,可以用即棄嘅錫紙糕盆或者呢啲有邊嘅碟,搽上一層薄薄嘅菜油,跟住將頭先嘅餅皮糊漿倒入糕盆內,盆面放一張煮食錫紙,以免有倒汗水滴落餅皮糊漿上面,再用大火隔水蒸30-35分鐘。蒸好嘅餅皮粉團,喺室溫下攤凍,待用。

喺蒸緊月餅皮嘅同時,用平底易潔鑊以中細火將20-30克嘅糯米粉慢慢炒成糕粉,大約炒5-7分鐘、見到本來嘅糯米粉開始變成黃黃哋就可以收火,倒起待用。

今日我就揀咗用現成嘅綠茶餡,大家亦可以揀唔同嘅味道一齊整,如果雪咗落冰格,記得整嘅前一日放返來雪格解凍。我會建議新手以1:1嘅比例做餅皮同餡料。將綠茶餡分成25克一個,如果怕整得慢,可以每個用保鮮紙包住,保住入面嘅水份。

跟住可以好似我咁將凍咗嘅粉團連埋表面嘅油重新搓一次,熟咗嘅菜油朔返落去粉團入邊,冰皮就更加煙韌同香滑喇!跟住將粉團搓成25克一粒,再壓成餅皮。大細要放得落頭先搓起嘅餡料,如果想整好嘅月餅切起餅皮均勻,就要內厚外簿喇!跟住就放入餡料,慢慢將餅皮收口,再將缺口位搓靚。

跟住將包好嘅粉團放落有糕粉嘅碗入面碌一碌,將粉團壓細再放入月餅模入邊,記得收口位向外,之後一隻手撳住月餅模底部,另一隻手大力撳落去幾下,咁靚嘅冰皮月餅就差唔多搞掂喇!跟住將完成品放入保鮮盒、上面加張廚房紙,再放落雪櫃,自製嘅冰皮月餅就完成喇!係唔係好簡單呢!等我切一個雪起嘅俾大家睇下啦!

祝大家中秋節快樂!

追蹤我們
公司殊榮
Copyright Claims
Copyright Claims