Z世代達人

播出日期:6/9/2021

一直以嚟WhatsApp都只容許一個手機號碼跟一部電話使用,最多就係可以開住部手機接駁網頁版,但手機一斷線,網頁版亦都會用唔到。傳聞已久嘅WhatsApp多機登入以及離線操作功能,部份特選嘅用戶已經有得試用喇!我就梗係要試俾你睇啦!

當我其中一部有參與試用計劃嘅手機更新完Whatsapp之後,就會收到通知可以試用新功能。只要加入呢個測試,就可以起唔需要保持手機嘅互聯網連線情況之下,同時喺另外4部裝置上面使用WhatsApp。好我撳咗喇!即刻試吓喺桌面電腦開個WhatsApp網頁版!只要我好似平時咁揀「已連結裝置」,由於程式更新咗,之前連結過嘅都要重新掃一次QR code。掃完就用得喇! 睇落就唔算有乜特別,話明手機本身係唔需要連接互聯網,咁就等我熄咗部手機先!喺熄咗主機嘅情況之下,一樣可以收、發訊息,而且我就試過睇返之前嘅訊息內容,可能因為係我啱啱連結呢個裝置嘅關係,部份相片就未能下載,不過文字信息就可以睇到三個月前,其實都夠用啦!最少電話冇電或者收唔到訊號,部用電腦都仲可以救住命!

另外,當開返主機嘅時候,相關嘅訊息同埋對話內容亦都會自動更新返。

頭先提過可以最高連接四部裝置,不過就只限網頁版,所以就算喺手機或者平板電腦都要通過瀏覽器先至可以用到相關嘅功能。等我試埋同時喺我部iPad度登入!而家無論桌面電腦定係我部iPad都一樣可以睇到同埋收發 WhatsApp 訊息,收到訊息兩邊都會同時推送㗎!不過要留意,由於用緊嘅係網頁版,喺電話或者平板電腦上係唔會有推送提示嘅。

相信呢個功能我好快就會比其他用戶使用。不過如果要多部電話同時用WhatsApp手機應用程式開同一個Account,相信都仲要再等等喇!

追蹤我們
公司殊榮
Copyright Claims
Copyright Claims